Cəmİyyət

İlham Quliyev: "İmkanlı ailədə dünyaya gəldim, ancaq..." - MÜSAHİBƏ

İlham Quliyev:
"Sual-Cavab" layihəsinin bu dəfəki qonağı media camiəsinin səmimi simalarından biri olan, 20 ildir "Kaspi" qəzetində çalışan və 4 ildən artıqdır ki, çalışdığı qəzetdə baş redaktor vəzifəsini icra edən İlham Quliyevdir.

 İlham Quliyevin müsahibəsini təqdim edirik:

- İlham müəllim, xoş gördük sizi. İstərdim ki, ilk öncə özünüz haqda danışasınız, uşaqlığınız necə keçib, necə xatırlayırsınız?
- 1977-ci ilin oktyabrında Ağsu rayonunun Xəlilli kəndində anadan olmuşam. Uşaqlığım Ağsu da keçsə də, 8-ci sinifdən Bakıya gəlmişəm. Bakıda Kimya-Biologiya Təmayüllü Liseydə təhsil almışam. Sonra Dövlət Pedaqoji Universitetinin kimya-biologiya fakültəsində bakalavr və magistr təhsilləri almışam. Valideynlərim tibb sahəsində təhsil almağımı istəyiblər. Onların tövsiyəsi ilə Kimya-Biologiya Təmayüllü Liseyidə oxudum, Tibb Universitetinin müalicə işi fakültəsinə qəbul oldum. Sadəcə, o vaxtlar qaydalar belə idi ki, ödənişli təhsil almaq üçün yenidən sənədləri vermək və müsabiqə prosesində iştirak etmək lazım idi. Həmin vaxtlar ölkənin çox çətin zamanları idi. Valideynlərimin də maddi baxımdan çox böyük problemləri var idi və təhsil haqqını ödəmək imkanı olmadığından, Pedaqoji Universitetində kimya-biologiya fakültəsində ödənişsiz təhsil almağı seçməli oldum. Artıq birinci kursdan müxtəlif media orqanlarına gediş-gəlişim yarandı. İkinci kursdan "Avrasiya" qəzetində çalışmağa başladım. O zamanlar ölkənin ən populyar, ən çoxtirajlı qəzetlərindən biri idi. Qəzetdə müxbir kimi fəaliyyətə başladım. Bir müddət çalışdıqdan sonra "Günaydın" qəzetinə transfer oldum. Çünki "Avrasiya"da ixtisarlar oldu. Mənim kimi yeni işə başlayan bir çox gənc ixtisara düşdü. Sevincim çox uzun çəkmədi (gülümsəyir- red.). "Günaydın"da çalışarkən məni "Kaspi" qəzetinə dəvət etdilər və 1999-cu ilin sentyabr ayından bu qəzetindəyəm. Onu da əlavə edim ki, lap əvvəl siyasət müxbiri olmuşam, sonra qəzetin parlament müxbiri kimi çalışmışam, siyasət şöbəsinə rəhbərlik etmişəm. 2005-ci ildən isə "Kaspi" qəzetinin baş redaktorunun müavini olmuşam. 2015-ci ildən də baş redaktoram. Artıq 4 ildın çoxdur bu vəzifədəyəm. Özümü gənc yaşlarından mediaya bağlı bir adam hesab edirəm.

- Uşaqlığınızdan bəhs etmişkən, daha çox nələrə və hansı istiqamətlərə maraq göstərdiniz?
- Valideynlərimin dediyinə görə, çox sakit uşaq olmuşam. Daha çox futbol azarkeşi idim. Xatırlayıram ki, 1996-cı ildə keçrilən Avropa çempionatını çox həvəslə izləyirdim. Özüm də bu oynu oynamağı çox sevirdim. Kitab oxumağı çox sevmişəm. 7-ci sinfə qədər kəndimizdə yerləşən kitabxanadakı kitabların hamısını oxumuşdum. Uşaqlıq illərimiz çox çətin keçib. Sovet hakimiyyəti dağıldı, dövlət müstəqilliyinin ilk illəri, maddi baxımdan çox çətinliklər var idi. Əslində mən imkanlı ailədə dünyaya gəlmişəm. Atam rəhbər vəzifədə, nəqliyyat sektorunda çalışıb. Amma 80-ci illərin sonunda atamın işlədiyi müəssisə tamamilə öz fəaliyyətini dayandırdı və ailəmizin çətin vaxtları başladı. Kənd təsərrüfatı ilə məşğul olurduq. Bu yükün böyük bir hissəsi mənim və qardaşlarımın üzərində idi.

- Futbola marağı olan yaxşı futbolçunun jurnalistika sahəsinə marağı necə yarandı?
- Futbolla yanaşı, oxumağa da çox böyük marağım olub. Babamın və atamın mütəmadi olaraq qəzet oxuması uşaq yaşlarımdan məndə oxumağa qarşı çox böyük həvəs yaratmışdı. Bu hisslərlə Bakıya gəldikdən sonra jurnalistika sahəsinə meyilləndim, redaksiyalara getdim, yazarlarla tanış oldum. Zaman keçdikcə ətrafım məni bu sahədə bacarıqlı olacağıma inandırdı. Artıq neçə illərdir bu peşədəyəm və heç də peşman deyiləm.

- Ali təhsiliniz kimya-biologiya sahəsində olsa da, jurnalistikada özünüzü sınadınız. İlk vaxtlar sizə çətin olmadı?
- Əlbəttə bu tərəddüdlər hər zaman var idi. Lakin ilk zamanlardan hiss etdim ki, elə mənim yerim buradır, bu sahənin adamıyam. Ətrafdakıların yazılarımı bəyənməsi məndə çox böyük inam yaradırdı. Bəzən maddi sıxıntılarımız olsa da, bu, düşkünlük yaratmırdı. Çünki bu işi sevirdik.

- 20 ildən artıqdır ki, "Kaspi" qəzetində çalışırsız. Eyni yerdə işləmək yorucu və darıxdırıcı deyil ki?
- Bəlkə də kənardan baxanda belə görünür. Amma mən təbiətcə mühafizəkar adamam. İstər iş, istərsə də gündəlik həyatımda radikal dəyişiklikləri sevən adam deyiləm. Əslində jurnalistika sahəsi çox rəngarəng bir sahədir. Burada hansısa televiziyada və ya redaksiyada işləməyin elə bir fərqi yoxdur. Biz hamımız eyni işlə məşğuluq. Burdam çıxıb başqa bir redaksiyaya getsəydim də, bu işi görəcəkdim. Ümumiyyətlə, heç vaxt "20 ildən artıq bir yerdə işləmək məni yorur" deyə düşünməmişəm (gülümsəyir- red.).

Yazılı media artıq əvvəlki əzəmətini itirməkdədir…

- "Kaspi" qəzetinin oxucu dairəsi və maliyyə durumu barədə nə deyə bilərsiniz?
- Biz "Kaspi"ni üç əsrin qəzeti adlandırırıq. 1881-ci ildən fəaliyyətə başlayan qəzet, sonradan 1918-ci ildə fəaliyyətini dayandırıb. 1999-cu ildən bu qəzet yenidən fəaliyyətini bərpa edib və tarixi ənənələrini davam etdirməyə çalışır. Çox əminliklə deyə bilərəm ki, Azərbaycanın çap mediasında xüsusi yeri, xüsusi dəsti-xətti olan bir qəzetə çevrilmişik. İnformasiya mühitində baş verən dəyişikliklərə də çevik reaksiya vermişik. Bilirik ki, yazılı media artıq əvvəlki əzəmətini itirməkdədir. Artıq bu sahəyə yeni tendensiyalar gəlməyə başlayıb. İnternet mediası çox güclənib və ümumi informasiya bazarında əsas gücə çevrilməyə başlayıb. Sosial şəbəkələr həyatımıza ciddi şəkildə daxil olub. Biz artıq bütün bu dəyişikliklərə tam olaraq uyğunlaşmışıq. Bizim onlayn rejimdə fəaliyyətdə olan saytımız var, "Kaspi" Azərbaycanda üç əlavəsi olan yeganə qəzetdir. Bu gün Azərbaycanda qəzet çap etmək fədakarlıqdır. Biz bu fədakarlığı oxucularımızın könlünü oxşaya bilmək üçün edirik. Hesab edirəm ki, Azərbaycanda "Kaspi" kimi qəzetlər çox olmalıdır.

- İllərdir media camiəsindəsiniz. Mətbuatın bugünkü durumunu necə dəyərləndirərdiniz? Baş verənlər sizi qane edirmi?
- Azərbaycan mətbuatı son 20-25 ildə çox böyük inkişaf yolu keçib. Bu illər ərzində ağır zamanlar da olub. Əvvəllər bəzi qəzetlər həftədə bir dəfə çap olunardı. Sonradan gündəlik çap formatına keçdilər. Tirajlarda çox böyük artımlar müşahidə olundu. Artıq 2000-ci illərin əvvəllərində internet mediasının sürətli inkişafı önəmli rol oynadı. Bu illəri nəzərə alaraq, ümumilikdə Azərbaycan mediasının çox şərəfli bir yol keçməsini qeyd etmək istərdim. Artıq özümüzə məxsus bir media camiəmiz var. Əvvəllər medianın fəaliyyəti dövlət tərəfindən tənzimlənirdi. Bununla bağlı xüsusi bir nazirlik fəaliyyət göstərirdi. Sonralar bu nazirlik öz fəaliyyətini dayandırdı və media özünü tənzimləmə mərhələsinə qədəm qoydu. Mətbuat Şurası təsis edildi və şuranın İdarə Heyəti seçildi. Bu qurum uzun illərdir ki, Azərbaycan mediasının istiqamət verici orqanı kimi fəaliyyət göstərir. Bu gün dövlət tərəfindən də mətbuat sahəsinə çox böyük maddi və mənəvi dəstək var.

- Peşənizin həm də hobbiniz olduğunu bildirdiniz. Nə zamansa özünüzü başqa bir sahədə sınamaq istərdinizmi?
- Mən işimi çox sevirəm və özümü başqa bir sahədə görmürəm. İxtisasca müəlliməm. Əgər nə zamansa mediaya ehtiyac olmazsa, müəllim kimi çalışa bilərəm. Çox güman ki, media sahəsində fəaliyyət göstərməsəydim, indi təhsil sektorunda çalışardım.

- Gələcək planlarınız haqqında nə deyə bilərsiniz?
- Gələcək planlarımız ancaq, "Kaspi"nin inkişafı ilə bağlıdır. İnternet resurslarımızın imkanlarını daha da genişləndirməliyik. Dünyada baş verən informasiya sektoru ilə bağlı prosesləri diqqətdə saxlamalıyıq. Yeni trendlərə uyğun Azərbaycan informasiya bazarında daha yaxşı mövqelərin ələ keçirilməsi üçün çalışmalıyıq. Bütün perspektiv inkişaf planlarımız bununla bağlıdır.sonxeber

XƏBƏR LENTİ

«    İyul 2019    »
B.eÇ.aÇC.aC.Ş.B
1234567
891011121314
15161718192021
22232425262728
293031